REUNIÓN CO CONSELLEIRO AGUSTÍN HERNÁNDEZ

Onte sábado, xunto ao al alcalde de Esgos e Oimbra e acompañados do Vicepresidente do Parlamento de Galicia, Jose Manuel Baltar mantivemos senllas reunións de traballo co Conselleiro de Medio Ambiente, Infraestruturas e Territorio, Agustín Hernández.

En concreto, na miña xuntanza expúxelle ao conselleiro a necesidade de arbitrar medidas que favorezan a compra de solo industrial no Barco para reactivar a economía da vila e da comarca, ante o cal, Agustín Hernández comprometeuse a estudar a posta en marcha de axudas específicas para emprededores e empresarios de Valdeorras que lles permitan acceder con menos esforzo á compra de parcelas. Asemade, o conselleiro apuntou outras posibilidades como son o aluguer con opción de compra ou ampliar escalonadamente ata tres anos o pago do 70% da compra de solo.

Tamén se abordou na reunión a necesidade de realizar un plan comarcal de transporte, que permita corrixir as deficiencias nas liñas de transporte tanto en tren como en autobús que ten O Barco, e susbsanar as carencias que neste momento presenta a estación de autobuses barquense.

Ademais da prioridade inmediata das axudas para o abaratamento do solo industrial, trasladeille ao Conselleiro as necesidades existentes en infraestruturas como son a circunvalación(enlace da N-120 e N-536), que permita sacar ao tráfico pesado do centro da vila, e a urxencia de solicitar ante o Goberno do Estado que se axilicen os prazos para a execución da futura autovía A-76, así como a liña de Alta Velocidade entre Ponferrada e Monforte.